Orcollo kampeon sa Derby Classic 9-Ball

MANILA, Philippines - Lumabas uli ang tikas ng paglalaro sa 9-ball ni Dennis Orcollo para hiranging kam­peon sa Derby City Classic 9-Ball division na nilaro sa Horseshoe Casino, Elizabeth, Indiana, USA.

Pinataob ni Orcollo ang hamon ni Sha­ne Van Boening sa finals, 7-2, para makuha ang kanyang unang major win sa taong 2011.

Isang gold medalist sa 9-ball sa 16th Asian Games sa Guangzhou China no­ong nakaraang taon, hindi binigyan ni Or­collo ng anumang kumpiyansa ang US player nang umabante agad sa 5-0 sa race to seven finals.

Narating ni Orcollo, isa ring World Mas­ters Champion noong 2010, ang finals nang pagpahingahin si Mika Immonen ng Finland, 7-1, habang nanaig naman si Van Boening kay Niels Feijen sa dikitang 7-6, sa semifinals.

Ang tagumpay ay nagkahalaga ng $16,000 para kay Orcollo na pararangalan din ng Philippine Sportswriters’ Association (PSA) bilang isa sa apat na Athletes of the Year,

Halagang $8,000 naman ang naibus­la ni Van Boening na lumabas pa rin bil­ang pinakamahusay na player sa 2011 Der­by City Classic matapos hirangin bilang kampeon sa Master of the Table title.

Sa pagpasok ni Van Boening sa 9-ball Finals ay nahigitan niya ang nakuhang mga puntos ng isa pang Filipino cue artist na si Alex Pagulayan para sa pinakaprestihiyosong titulo sa Derby City Classic.

Nag-uwi si Van Boening na nagkam­peon din sa One Pocket division, ng halagang $20,000 habang si Pagulayan na na­nalo sa Banks Division, pero pumang-si­yam lamang sa 9-ball, ay nalagay sa ika­lawang puwesto para sa $3,000.