Pusok Cemento cagefest gisugdan na

CEBU, Philippines - Pormal nga gisugdan ang liga sa basketbol sa Pusok Cemento Basketball Association (PCBA ) sa barangay Pusok dakbayan sa Lapu-Lapu sa milabay'ng adlaw.

Ang maong liga gisugdan pinaagi sa usa ka parada libot sa maong barangay.

Si PCBA president Francis Ibo maoy mihimo sa ceremonial toss timaan sa pormal nga pagsugod sa maong liga.

Dose ka mga teams ang nisalmot ug kini mao ang MP Customs Brokerage (diin si Ibo magduwa), Casyco, Big Boss, Fit-Top on Line, B & B, Capt. Roque, Thunder, Lumbres (Gold), Lumbres (Purple), PRR Patriots, Block VII ug Black Hawk.

Gawas sa tropeyo, ang kampiyon mobulsa og P5,000, mopahiluna sa ikaduha makaangkon og P3,000, samtang ang ikatulo makadawat og P2,000.

Ang maong liga tipik sa nagsingabot nga kapistahan sa ilang mahal nga patrona "Inahan sa Kanunay'ng Panabang" sa katapusang semana ning bulan sa Enero.

Matud pa ni Ibo nga lakip sa katuyoan sa maong liga mao ang paglikay sa mga batan-on nga malambigit sa illegal nga kalihukan sama sa drogas ug sugal ug magsentro na lang unya sila sa paugnat sa kusog. (BANAT NEWS)