CEBU, Philippines - Human sa Asian Congress of Cardiologist ug Crossing Bridges kon pagsuroy-suroy sa ASEAN photographers dinhi sa Sugbu sa sayong bahin sa bulan sa Disyembre, may lain na usab nga international event ang paabutong ipahigayon dinhi sa lalawigan sa Sugbu sunod tuig.
Kini ang gipahibawo sa buhatan ni Gobernador Gwendolyn Garcia human nibisita sa gobernador ang Operations Director sa Sunrise Events Inc. nga si Guy Concepcion, usa sa organizers sa World Triathlon Championship.
Matud pa ni Concepcion, nga ang World Triathlon Championship anhi ipahigayon dinhi sa Sugbu.
Nagkanayon sab si Concepcion, nga ilang napilian ang lalawigan sa Sugbu gumikan kay naila kini nga tourists destination sa Pilipinas ug dili lisud kanilang mga organizers paghatag og accommodations ngadto sa mga langyaw nga mga atleta tungod kay daghan na man ang mga hotels ug beach resorts nga kasuroyan sa mga bisita.
Sumala pang Concepcion nga buot usab nila nga ma-promote dinhi sa Sugbu ang sports tourism aron daghang mga events sa sports ang mosunod unya sa ilang World Triathlon Championship.
Gitumbok niini nga ang napilian nila nga lungsod mao ang Liloan tungod sa nindot nga lugar.
Misaad si Garcia nga ang kagamhanan sa lalawigan sa Sugbu mosuporta ug mohatag og ayuda sa maong sports event.
Kahinumduman nga ang nasud sa Pilipinas nalakip na sa Global Tour matag tuig ug sa milabay’ng duha ka tuig ang maong matang sa paugnat sa kusog didto ra gipahigayon sa Camarines Sur. (BANATSPORTS)