Solmeat, Rulls Bakeshop ug Cavs gisubha'g daog

CEBU, Philippines - Gisugat dayon og daog ang Solmeat, Rulls Home Bakeshop ug Cavs teams sa   una nilang duwa sa LLBA Rollway Christmas League 2010 didto sa Villas Magallanes gym sa Sta. Lucia Property sa Lapu-Lapu City.

Ang Solmeat yano kaayong mikulit og daog pinaagi sa paglubong sa Boyla’s Hotel, 73-48, samtang ang Rulls Bakeshop mihaon sab og daog batok sa AJY, 78-66 ug ang Cavs mipukan sa Leo Auto Shop sa iskor nga 85-78.

Wala gyud batia’g kalisang   ang Solmeat ni team owner Leo Bascon kay sayo kaayo sila nga miposte’g makalumos nga labaw.

Si Jerome Plarisan mi-iskor og 24 puntos aron pangulohan ang Solmeat, gisundan ni Dandan Ramos sa iyang 14 puntos, samtang si Niel Belga miamot og 13 puntos.

Ang pilderong Boyla ni team owner Hamilton Gilig gipangulohan sa mga Paquibot nga sila si Loven ug Benny nga mipupo og 13 ug 11 puntos matag usa.

Sa laing bahin, si Allan mimanso og 18 puntos aron pangulohan ang Rulls Bakeshop ni team owner ni Rupert Cañizar. Si Bosyo Ompad misansan og 16 puntos. Ang nabuntog nga AJY gipangulohan ni team owner Allan Yu, kinsa mipabuto og 17 puntos, sila si Joel Ochea ug Tata Bardago nagkumboya og 27 puntos.

Sila si Jimboy Igot ug Junjun Igot mibugha og 14 puntos matag usa aron pangulohan ang Cavs ni Dr. Michael Ouano pagbuntog sa Leo Auto Shop ni Leo Almacin nga gipangulohan sab nilang Noli Paquibot ug Joman Cosep, kinsa mimaneho og 16 puntos matag usa.