Tabal sunod nga Marathon Queen

CEBU, Philippines - Sa edad nga 21 anyos, napakita na sa Sugbuanang teen running sensation Mary Joy Tabal nga kaya niya nga mosabay sa mga banggiitang local ug international marathoners.

Ang graduating commerce student sa Southwestern University (SWU) nga si Tabal mihimo sa labing impresibong performance karong tuiga dihang iyang gisakmit ang korona sa 21k female division sa Cebu leg sa 34th Milo Marathon.

Apan milugwa ang iyang ngalan didto sa kaulohan dihang iyang nakuha ang ikatulong dapit sa 42K National Milo Marathon, nga maoy labing una niyang full marathon.

"Ang ako lang kay suwayan lang ta nako kung asa ko kutob sa akong pagdagan sa full marathon, pero wa ko nagdahum nga makuha nako ang third place," matud pa ni Tabal

Dili sayon ang dalan nga gitaak ni Tabal padulong ngadto sa kalampusan tungod kay dakung adjustments ang iyang gibuhat tungod kay dili siya usa ka natural sprinter ug labaw nang dili long distance runner.  – BANAT NEWS