Cebu PRISAA di na kapugngan sa RCG

CEBU, Philippines - Gipahimuslan sa Team Cebu City ang homecourt advantage ug padayon kining mikabkab og mga bulawan sa nagkadaiyang sporting events atol sa penultimate day sa Regional Collegiate Games kagahapon diha sa Cebu City Sports Center (CCSC).

Ang multi-titled tankers nga si Loren Dale Echavez ug Noel Caneda maoy nanguo sa Cebu PRISAA sa swimming event human mihakot og lima ka bulawan matag usa sa 28 golds, 26 silvers ug tulo ka bronzes nga napupo sa Cebu swimming team.

Si Abegail Sakib miani og tulo ka golds, si Claudine Candia adunay duha ug si Alla Ababon mipupo og usa ka gold. Sila si Jesse Arriola, Jebb Cane ug Rick Solijon midugang og duha ka golds matag usa, samtang si Rowan Fernandez ug Jupet Guno adunay tag-usa ka gold.

Ang Cebu PRISAA midaog sab sa kampiyonato sa sepak takraw kortesiya nilang Jade Batac, Gilbert Bacolod, Erec Dean Cabrera, Joselito Retua, Charleton Belande, John Toong, Henry Danlag, Arnold Niedo ug Jonathan Pepito. (BANATSPORTS)