Phl Patriots pipiliting makabalik sa porma vs Indonesians sa Jakarta

MANILA, Philippines - Maipakitang may kakayahan pa rin ang Philippine Pa­triots na madepensahan ang ASEAN Basketball League (ABL) title sa Season ang gagawin ng koponan sa pagdayo sa Jakarta upang harapin sa ikalawang pag­ka­kataon ang Satria Muda BirtAma sa Indonesia.

Ganap na alas-6 ng gabi itinakda ang sagupaan na kung saan pakay ng bisitang Patriots na mawakasan ang da­lawang dikit na kabiguan na tinamo ng koponan.          

Matapos mapahiya sa Chang Thailand Slammers, 68-69, nabigo uli ang nagdedepensang koponan sa West­ports KL Dragons, 81-96, upang malaglag sa 6-3 karta.

Sisikapin ng Patriots na mapigilan ang pagkakalapag sa 0-3 karta sa pagbangga sa Indonesian team na tinalo ng Pilipinas sa ABL Series One at may pinakamasamang 2-8 record.

Hindi magagamit ng Patriots ang serbisyo ni 6’10 import Donald Little kaya’t iaasa ng koponang pag-aari nina Mikee Romero at Tony Boy Cojuangco ang kam­panya sa ibang players sa pangunguna ni 6’3 Rashiem Wright na nagpasabog ng 31 puntos sa huling nabigong tagisan

Solo sa liderato ang Chang Thailand Slammers sa 7-2 karta habang ang Pilipinas ang nasa ikalawang pu­westo sa 6-3 karta.

Ang Dragons ay nakasunod sa 5-4 karta kasama ng Singapore Slingers bago sundan ng Brunei (3-7) at BritAma (2-8).

Ang mangungunang apat na koponan matapos ang triple round elimination ang uusad sa cross over se­mifinals na isang best-of-three series.