Aparente bayani sa Yellow

CEBU, Philippines - Nakalingkawas ang Yellow team sa kulbahinam nga duwa pinaagi sa pagmanso og nipis nga kadaugan, 105-104 batok sa Violet team sa Phase 3 Camella Homes Sunday Club basketball tournament didto sa Villas Magallanes Gym sa Sta. Lucia Property sa Lapu-Lapu City.

Dili matag-an kun asa mapunta ang daog gumikay kay grabe kaayo kahingpit ang duwa ug gani nagtabla ang iskor, 60-all paghuman sa third period.

Daw giharian sa ilang opensa ang duha ka kampo ug nagbanos-banos og pabuhagay og puntos sa fourth period nga nakapahinam sa duwa.

Modaog na unta ang Violet dihang milabaw kini og uno punto, 104-103 sa himalatyong oras, ang nakasakit kay si Dodong Aparente takwahaw lang   mipatuasik sa iyang tirada aron luwason ang Yellow ni team owner Rolly dela Pieza.

Sa naandan, si Centes Brañanola mao ang topscorer sa Yellow nga mirehistro og 26 puntos, gisundan ni Dennis dela Pieza nga adunay 20 puntos. Sila si Ramil Cortes ug Leo Almacin mitimang og 14 puntos matag usa, si Bebot Pleños mitampo'g 10 puntos, samtang si Aparente adunay siyete puntos.

Sila si Alan Sepe ug Amay Palad maoy nangulo sa naparot nga Violet nga miburak og 29 ug 20 puntos matag usa.

PUNTOS MATAG USA

YELLOW (105) - Brañanola 26, D. Dela Pieza 20, Cortes 14, Almacin 14, Pleños 10, R. Dela Pieza 7, Aparente 7, Lorena 5, Tongol 2

VIOLET (104) - Sepe 29, Palad 20, Villaruel 18, Geraldez 12, Rabi 6, Balberona 5, Baring 5, Villapez 4, Sumilang 4, Maratas 1  (BANAT)