CEBU, Philippines - Gipilde sa Red-Barkadas ang White-Joules, 93-82 aron maghari sa Los Amigos Basketball Association (LABA) Inter-color basketball tournament didto sa Banilad Sports Complex.
Sa sayo pa, ang Black-Snipers miangkon sa ikatulong puwesto human ilang gisumpo ang Yellow-Bombers sa iskor nga 114-104.
Dili na malalis kun kinsa ang mogawas nga mananaog human ang Red milansang og 22 puntos nga labaw sa halftime, 53-31. Sila si Donald Diaz, Fredo Dakay ug Merot Ygoña nagkumboya’g 29 sa 34 puntos nga nahipos sa Red sa second quarter.
Ang White milupig sa Red sa pinuntosay sa third period, 30-18, aron mosikit ngadto sa labing duol nga kuwatro puntos, 71-75 pinaagi sa basket ni Dodoy Rizane sa nahabiling 5:52 sa duwa.
Sila si Diaz ug Dakay maoy topscorer sa Red nga parehong mi-iskor og 18 puntos, samtang si Ygoña midugang og 12 puntos.
Ang White gipangulohan sab nilang Rizane ug Jun Perolino nga adunay 21 matag usa, samtang sila si Roy Yamomo ug Nestor Lagaras parehong miamot og 17 puntos.