Hoopers wala gihapo'y pilde sa picpa

CEBU, Philippines - Wala gihapon makatilaw og pilde ang Hoopers Five ni team captain Yoli Meso kinsa mikulit sa ilang ika-upat nga sagunson nga daog human ilang gibihag ang Next Gen Security Agency ni Rheneir Mora sa iskor, 78-69 kaniadotng Sabado ug padayong naghupot sa liderato atol sa pagsugod sa second round sa Philippine Institute of Certified Public Accountants (PICPA) 2010 Christmas basketball tournament didto sa Capitol Parish gym sa dan Escario, ning dakbayan.

Sa laing duwa, midaog nga wala'y hago ug walay singot ang AGA-CPA nga gipangulohan ni Sam Malazarte pinaagi sa usa ka default batok sa MBP Accounting and Law Office hinungdan nagtabla na sila karon sa 1-3 nga baraha.

Igo lang milabaw og dos puntos ang Hoopers, 22-20 human sa first period ug ila kinihg giinat atol sa halftime, 39-33. Padayon silang naglabaw pagsugod sa fourth quarter sa iskor, 58-51 ginamit ang hugot nga depensa nga gipatuman ni coach Norwin Honoridez.

Human sa maanindot nga duwa ni Andre Tocao sa first period, mi-abang sila si Lito Ortiz ug Meso sa opensa atol sa fourth period ug wala nila tugoti nga makasikit og usab ang Next Gen Security Agency nga gipangulohan nilang Ryan Baso kinsa miburak og 33 puntos.

Sila si Tocao ug Ortiz maoy nangu sa Hoopers sa ilang 26 ug 20 puntos, matag usa ug si Jomar Torres midugang og 13 puntos.

Mi-iskor sab og double figures silang Art Flores ug Ryan Alejandre ug nagkumboya og 22 puntos alang sa Next Gen.