CEBU, Philippines - Usa ka makalilisang nga left hook ngadto sa apapangig ni Paul Williams ang gibuhian Argentinean Sergio Martinez kinsa milampos pagdepensa sa iyang WBC middleweight title didto sa Atlantic City, USA.
Gitinuod ni Martinez ang iyang bahad nga tumbahon ang Amerikano nga si Williams dihang human sila magsinukdanay sa unang round, nakahigayun siya sa second round dihang mibuka ang depensa ni Williams nga maoy iyang gipahimuslan aron pagpatugpa og usa ka solido nga kumo.
Tungod sa kakusug sa sumbag natumba sama sa usa ka dakung buli si Williams ug daling gitabang sa physician human kini wala na milihok ug igo nalang naghayang nga nagsiga ang mata.
Gawas sa pagdepensa sa iyang bakus, tam-is usab kini nga kadaugan alang ni Martinez kinsa nakabawus na human siya gipilde ni Williams sa una nilang sangka pinaagi sa usa ka kontrobersiyal nga majority decision niadtong miaging tuig.
Si Martinez kinsa gituohang makig-ilog ni Manny Pacquiao sa "Best Fighter of the Year" award, misaka sa record nga 46-2-2, 25KOs, samtang si Williams kinsa ning bag-o mihagit ni Pacquiao alang sa usa ka sangka nakahiagum sa ikaduha niyang pilde sud sa 41 ka away.