Hoopers, 3-0 na sa PICPA

CEBU, Philippines - Mikulit sa ilang ikatulong sagunson nga daog ang Hoopers Five nga gipangulohan sa ilang captain ball nga si Yoli Meso aron haruson ang elimination round human sila modaog batok sa MPB Accounting and Law Office ni Atty. Melvin Pañares sa iskor, 74-55 kaniadtong Sabado atol sa nagpadayong Philippine Institute of Certified Public Accountants (PICPA) didto sa Capitol Parish gym sa dalan Escario, ning dakbayan.

Bisan kanunay silang naglabaw, ang Hoopers didto na makahigayon og hipos og double-figure nga abante sa fourth period tungod kay wala molugak kanila ang ilang kaatbang kinsa wala na kapugngi dihang nagmangtas na sila si Andre Tocao ug Benedict Bandala aron pangulohan ang opensa.

Si Tocao miburak og 18 puntos ug si Bandala midugang ug 15 puntos alang sa 3-0 nga Hoopers ug si Jomar Torres miamot og 10 puntos.

Ang MBP Accounting and Law Office gipangulohan ni Khan Guieb kinsa mi-iskor og 12 puntos ug mi-abuno sila si Edward Bauzon ug Ram il Oliveros og 12 puntos matag usa..

Sa laing duwa, gilubong sab sa Next Gen Security Agency ni Atty. Rheneir Mora ang walay daugdaog nga AGA-CPA sa iskor 73-57 alang sa ilang ikaduhang daog sulod sa tulo ka duwa.

Ang mas batan-ong Next Gen Security Agency gipangulohan nilang Ryan Basco ug Rengie Galo kinsa mibahug og 23 ug 20 puntos, matag usa samtang si Jun Basco maoy nangu sa AGA-CPA sa iyang 26 puntos. Nakawang lang sab ang paningkamot nilang Sam Malazarte ug Jessie Gabatan kinsa mi-iskor ug double figures alang sa AGA-CPA kinsa nahiagom sa ilang ikatulong sunod-sunod nga kapildihan.