CEBU, Philippines - Ang Sugbuanong OPBF champion nga si Rocky Fuentes, moaway na sab sa iyang balwarte sa gikatakda niyang title defense batok ni Inthanon Sitchamuang sa undercard sa "Pinoy Pride 2" karong Nobiyembre 27 diha sa Waterfront Cebu City Hotel and Casino.
Si Fuentes nagpanikad na karon nga modepensa sa OPBF flyweight belt nga iyang nadaog gikan ni Masafumi Okubo niadtong Marso 9 didto sa Korakuen Hall sa Tokyo, Japan.
Iyang nadepensahan ang korona sa makaduha ka higayon ning tuiga didto sa Tokyo pinaagi sa 11th round TKO batok Shigetaka Ikehara niadtong Hunyo 5, 2010 ug ning bag-o batok ni Yasuto Aritomi pinaagi sa 8th round TKO didto sa Nagoya ug Yasuto Aritomi niadtong Septiyembre 5.
Si Fuentes adunay rekord nga 27 ka daog, 17 niini gikan sa knockout ug unom ka pilde, samtang si Sitchamuang, kinsa laraw nga mohimo og dakung upset adunay siyam ka daog ug duha ka pilde.
Wala hinuon misaad og knockout, apan kompiyansa si Fuentes nga molampos siya pagdepensa sa iyang bakus atubangan sa iyang mga katagilungsod. – BANAT NEWS