CEBU, Philippines - Turno na usab sa mga kawani sa Cebu City Hall nga mopakita sa ilang abilidad sa natad sa sports atol sa 19th City Hall Olympics nga buksan karong Nobiyembre 16 diha sa Cebu City Sports Center (CCSC).
Sa dili pa ang tournament proper, adunay fun run nga pagahimuon nga manukad diha sa Plaza Sugbu paingon sa CCSC, dayon isunod ang parada sa mga partisipanteng koponan.
Molamas sa opening ceremonies mao ang pagpili og "Ms. 19th City Hall Olympics ug ang "Pahugyaw sa Sayaw" sa matag koponan.
Mga koponan nga mosalmot mao ang Human Resource Dept. Office (HRDO), City Administration Office, General Service Office, DEPW, MICS, DMDP, Accounting Dept., OCCR, City Assessor, CCM, DVMF, City Planning Dept., Budget Dept., Legal Office, CTO, SP, DSWS, CHD, Agriculture ug ang Mayor's Office nga pangulohan ni Cebu City Mayor Michael Rama.
Mga duwa nga tigian naglakip sa basketball, volleyball, track and field, badminton, chess, darts, scrabble, table tennis ug mga Pinoygames.
Ang overall champion mobulsa og P20,000 nga ganting salapi, ang mopahiluna sa ikaduha makaangkon og P15,000, samtang ang ikatulo makadawat og P10,000.
Ang mopatong sa ikaupat hatagan og P5,000. (BANATSPORTS)