UV, Ave Maria magtigi sa Carcar

CEBU, Philippines - Ang kampiyon sa Aloguinsan Mayor’s Cup, ang Ave Maria Sanctuary Park ni team owner Raffy Senining nga gilangkuban sa mga kanhi ug kasamtangang players gikan sa University of San Jose-Recoletos (USJR) Jaguars makigsangka sa ilang higpit nga karibal sa Cebu Schools Athletic Foundation Inc. (CESAFI)   University of the Visayas (UV) Green Lancers karong gabii sa usa ka gikahinamang duwa atol sa pagbukas sa Carcar Mayor’s Cup Open didto sa Carcar Sports Complex.

Sa ilang head-to-head match-up, ang Jaguars wala pa modaog batok sa Lancers sulod sa upat ka higayon nga nag-abot sila sa CESAFI finals.

Sa dili pa magsangka ang Jaguars ug Lancers, magtigi una ang CEBECO batok sa Matmat Chicharon sa 35-year above division, samtang ang Perelos makigsangka batok sa Valladolid sa SK division.

Matud pa ni Carcar Mayor’s Cup commissioner Julie Flores nga ang modaog karong gabhiona tali sa CEBECO ug Matmat Chicharon, moabante sa semifinals.

Ang Carcar Open division nga matapos karong Nobiyembre 13, gisalmotan og pito ka teams ug kini mao ang Ave Maria, UV Lancers, SWU Cobras, USC Warriors, ACES, Colis ug Argao.

Gawas sa mga tropeyo, ang kampiyon makadawat og P50,000, ang second placer makaangkon og P30,000 ug ang third placer mobulsa'g P20,000. – BANAT NEWS