CEBU, Philippines - Layo na siya'g naabtan kun sa natad sa amateur basketball ang hisgutan, apan gihatagan gihapon og bili sa batan-ong basketball prospect Mark Jayven Tallo ang ilang gym diin siya nakat-on sa pagduwa.
Si Tallo, maoy labing unang Talk N’ Text MVP ng Bayan niadtong miaging Hunyo didto sa Makati ug nadaog niya ang P100,000 scholarship ug usa ka sports program nga maoy iyang gigamit pagpanidot sa Benjamin Solon Memorial gym sa Barangay Cogon Ramos, ning siyudad.
"Dinhi ko kanhi magduwa og basketbol. Nakita nako ang dakung importansiya sa maong gym sa mga lumulupyo sa barangay," matud pa ni Tallo, anak sa kanhi national player ug PBA cager Mark Anthony Tallo.
Usa usab si Tallo sa mga dinapit sa opening sa TnT Liga ng Bayan basketball tournament niadtong miaging semana diha sa Cogon Ramos Gym.
Ang juniors MVP sa miaging 9th season sa CESAFI nga si Tallo mibutyag nga damgo niya ang makaduwa sa mas daku nga liga nga mao ang UAAP didto sa kaulohan o malakip sa Smart Gilas Pilipinas. – BANAT NEWS