Cebu City, Mandaue mag-ilog sa dungog

CEBU, Philippines - Misamot kainit ang panagribal sa duha ka higanteng koponan, ang defending champion Team Cebu City-Omega ug sa Mandaue City team sa 2010 PLDT-ABAP Visayas Amateur Boxing Championship diha sa Mandaue City Heritage Park.

Ang Team Cebu ug host   Mandaue segurado na alang sa usa ka silver human miabante ang ilang boksidor sa finals, samtang siyam usab niini segurado na sa broze medals. Wala usab magpabitin ang Bago nga adunay duha ka boksidor nga miabante sa final ug tulo sa semifinals.

Mga boksidor sa Team Cebu nga mohatag og bronze medals mao sila si Ardie Boyose, Steven Noblefranca ug Klein Tacorda sa juniors division ug sila si Uelmark Dignos, Jordan Catubay, Jared Payao, Raymund Empec, Charlie Pucdol ug Jack Tepora sa youth class.

Duha ka mga boksidor sa Team Cebu nga sila si Jahil Ala ug Ramjess Colina ang wala buligi'g suwerte gumikan kay nangapukan sila nilang Aljo Oro sa Sagay ug Rodel Wenceslao sa Phil-Australia Boxing Club.

Ang siyam ka mga boksidor sa Mandaue team nga segurado na nga moabante sa semis mao sila si Kevin Catajara, Albert Pagara, Mark Bernaldez, Dannlou Codilla, Roexyl Tabogo, Michael Romarate, Christian Apawan, Melvin Besinga ug Robert Etorma.