Emerald Jubilee Run gitakda sa Nob. 6

CEBU, Philippines - Agi’g pagsaulog sa ika-35 nila ka tuig o Emerald Anniversary, ang Marie Ernestine School mopahigayon sa labing una nilang fun run nga uloha'g Emerald Jubilee Run karong Nobiyembre 6 diha sa The Terraces sa Ayala Center-Cebu.

Ang lumba naglatid sa 10K, 5K, 3K, 1.6K ug 200m kiddie run.

"Nakahukom mi nga himuon ang maong fun run isip highlight event sa among 35th anniversary and we are planning to make it a yearly race based on the response of the runners," matud pa ni   Marie Ernestine School Director Denise Fajatin-Pegarido sa press conference didto sa Bo’s Coffee sa Osmeña Blvd., ning siyudad.

Mga medalya ang madawat sa top three finishers sa matag kategoriya, samtang makadawat og tree seedlings ang unang 350 finishers.

Ang maong mga seedlings itanom didto sa Nature Park   nga nahimutang sa North Campus sa Marie Ernestine School sa Budlaan, Talamban.

Niadtong interesadong mosalmot, mahimong   magparehistro diha sa RUNNR sa Ayala Active Zone. Ang registration fee nagkantidad og   P250 libre na ang singlet ug snacks. – BANAT NEWS