Lain na sab nga kontrobersiya sa CESAFI

CEBU, Philippines - Daw sa dili gyud mahubsan og kontrobersiyal nga isyu ang Cebu Schools Athletic Foundation, Inc. (CESAFI) ug ang labing bag-o mao ang kalit nga pag-usab sa iskedyul ug dulot sa bukog ang hukom sa kampo sa Southwestern University (SWU) Cobras nga dili sila moduwa karon kun dili ang USC Warriors maoy ilang kontrahon inay ang University of Cebu (UC) Webmasters.

Mao kini ang gitug-an ni Cobras team manager Ryan Aznar, kinsa hugtanong mipahibalo nga dili sila moduwa batok sa Webmasters kay dili kini mao ang orihinal nga nahilatid sa iskedyul nga gipanghatag sa mga sakop sa media atol sa pagbukas sa 10th CESAFI niadtong Hulyo 1.

"Over my dead body. No matter if we are banned for life we will not play unless San Carlos among kontrahon," matud pa ni Aznar.

"Bahala na’g i-ban for life mi basta dili gyud mi moduwa. Tan-awon lang nato kun kinsay ma-uwawan. School league man kaha ni?," dugang pa niya.

Ang team officials sa Warriors pinangulohan ni coach Mike Reyes mibisita sa buhatan ni Aznar didto sa SWU kagahapon aron makighinabi sa angay nilang buhaton.

Sa orihinal nga schedule, gibutang didto nga ang duwa sa Oktubre 2 (karong adlawa) mao ang Winner Game 1 vs. Loser Game 2 and Winner Game 2 vs. Loser Game 1.

Ang Cobras maoy midaog sa unang duwa sa semifinals batok sa University of the Visayas (UV) Green Lancers. Sila unta maoy makigsangka batok sa Warriors ug ang Webmasters maoy makigsangka sa Lancers.

Ang Loser vs. Loser ug Winner vs Winner ugma pa unta ipahigayon.  (BANATSPORTS)