CEBU, Philippines - Bukas na ang libro alang sa registration sa Philippine College of Surgeons (PCS)-Pink October Run nga mosikad karong Domingo diha sa The Terraces sa Ayala Center-Cebu.
Mga beterano ug fun runners mahimo nang magpalista karon diha sa Cebu Doctors' University (CDU) Hospital ug sa Active Zone-Ayala.
Tulo ka kategoriya ang tigian sa maong lumba ug kini mao ang 10K, 5K ug 3K fun run.
Sa P200 nga registration fee, ang mga partisipante makakuha na og libreng singlet ug race number.
Gawas sa ganting salapi, ang top three winners sa 10K kaw-itan sab og medalya. Makadawat sab og medalya ang unang 100 finishers sa maong kategoriya.
Human sa lumba, ang mga partisipante giawhag sa pagsalmot sa forum mahitungod sa Breast Cancer Awareness nga maoy tema sa maong lumba.
Ang lumba namugna pinaagi sa hiniusang puwersa sa PSC, Ayala Center Cebu, Rotary Club of Cebu Fuente, Run for Sight ni Dr. Yong Larrazabal ug ni race director Joel Baring sa Sports and Fitness Enthusiasts (SAFE). (BANATSPORTS)