CESAFI All-Star Selection roster vs. San Miguel giladlad

CEBU, Philippines - Giladlad na kagahapon ang 15-man roster sa Cebu Schools Athletic Foundation, Inc. (CESAFI) All-Star Selection, kinsa makigsangka batok sa paboritong team sa PBA San Miguel Beer alang sa usa ka charity game karong Biyernes diha sa Cebu Coliseum.

Si coach Elmer 'Boy' Cabahug sa nine-time champion University of the Visayas (UV) Green Lancers maoy mipili ug gipahibalo kini human sa gipahigayong CESAFI All-Star Games niadtong Domingo diin ang East miharos batok sa West sa collegiate ug secondary divisions.

Gipangulohan ni 6-foot-9 Junemar Fajardo sa UC Webmasters, ang 15-man CESAFI All-Star selection gilangkuban nilang Harold Cincoflores, Ralf Olivares, Jerome Silva, Rene Jun Saycon, Adrian Lao, Phil Mercader ug Eman Calo sa UV, Fajardo ug Edward Pao sa UC, Arrd Evan Diango ug Rene Pacquiao sa SWU, Michael Cantonao ug Sam Hermosa sa USC ug Kurt Amores sa USJ-R.

Ang organizers sa nahisgutang charity mopatawag og press conference ugma sa alas-3 sa hapon diha sa Vanille Resto aron tukion pa ang dugang mga detalye sa maong promosyon nga gipasiugdahan sa Rotary Club of Cebu South. (BANAT NEWS)