'Bata' hari sa Predator 10-ball

CEBU, Philippines - Nagpahugtanay sa bakus sila si Efren 'Magician' Reyes, ang hari sa billiards sa Angeles City, Pampanga ug si Roberto 'Superman' Gomez, ang bag-ong bitoon gikan sa Zamboanga City, apan mipatigbabaw ang nahiuna pinaagi sa tinagoay sa bola sa labing sikit nga sangka sa iskor, 10-9 aron sakmiton ang korona atol sa ilang All-Filipino finals sa Predator 10-Ball International Championship didto sa SM North EDSA sa Metro Manila.

Una untang naglabaw ang batan-ong pambato sa Zambonga sa iskor, 5-1, apan ang beteranong si Reyes hinay-hinay nga misikit, 3-5. Dali sab hinuon nakabawi si Gomez ug gihimo niya ang iskor ngadto sa 6-3.

Padayong naghupot og tulo ka rack nga abante si Gomez, 7-4 ug tulo na lang unta ka racks ang iyang dag-on aron mahimong kampiyon, apan gitabla kini ni Reyes ngadto sa 7-all pinaagi sa pagharos sa unom sa walo ka racks.

Nasakmit ni Reyes ang liderato sa labing unang higayon, 8-7 human sa iyang 1-0 nga labaw, apan gitabla sab kini ni Gomez sa 8-all.

Nakuha na sab ni Reyes ang pabor, 9-8 ug misamot ka kulbahinam ang duwa dihang nakatabla si Gomez ug ang labing importante, siya maoy mi-break sa 10th ug final rack.

Tungod sa ilang mga taktika pagtago sa bola aron maglisod og tirada ang kontra, didto gipakita ni Reyes ang iyang bentaha ug kahanas aron malusot sa mata sa dagom ug midaog sa iskor, 10-9.

Si Gomez maoy unang misakmit sa luna sa finals human iyang na-upset ang mas beteranong si Lee Van Corteza sa iskor, 9-3 atol sa semifinals, samtang si Reyes miabante sa final human midaog batok sa Amerikanong si Rodney Morris sa iskor, 9-5.

Si Reyes mibulsa og US$12 million sa iyang kadaugan sa maong torneyo nga gipaluyohan sa Dragon Promotions.