Sportsfest sa Consolacion

CEBU, Philippines - Nagkadaiyang kalihukan sa paugnat sa kusog ang molamas sa tinuig nga kapistahan sa Consolacion agi’g pagtamod sa ilang mahal nga patron St. Narciso.

Ang sportsfest pormal nga buksan pinaagi sa bonggang opening ceremony karong Septiyembre 12 diha sa Sta. Lucia grounds.

Kinauyokan sa duha ka bulan nga kompetisyon mao ang basketball tournament nga ulohan og “Mayor Alegado Cup Fiesta League” nga pagasalmotan sa 21 ka barangays nga gibahin ngadto sa lima ka clusters.

Ang Sangguniang Kabataan (SK) category pangulohan ni SK Federation president Madel Hyacinth Herrera, samtang ang Association of Barangay Council (ABC), inter-barangay ug invitational class pagadumalaon ni sports commissioner Paul Alelu Q. Flores, ang kanhi star guard sa Far Eastern University (FEU) Tamaraws sa dihang niduwa pa kini sa UAAP.

Walo ka teams ang mopakita’g aksiyon sa invitational category nga mosubay og double round robin elimination format. Ang kampiyon mobulsa og P50,000, samtang ang runner-up makadawat og P20,000.

Aron mahimong mabulokon ang kompetisyon, ang lokal nga kagamhanan ubos sa liderato ni Mayor Teresa P. Alegado ug vice mayor Aurelio Damole, mitunol og P150,000 aron sa pag- renovate sa Consolacion Sports Complex.

May mga koponan sab alang sa municipal hall employees, lay ministers ug priests.

Gawas sa basketbol, may ipahigayon sab nga soccer invitational league, “dayon-dayon” volleyball ug boxing promotion.

Ang soccer pagadumalaon ni Engr. Nilo A. Ferraren, kinsa mao sab ang committee chairman sa games and amusements, uban ni Ryen Villagas isip commissioner, ang dayon-dayon volleyball pagadumalaon sa mga sakop sa Sangguniang Bayan uban ni Camie Go isip commissioner, samtang ang boxing card pagadumalaon nilang barangay councilors Luis Melendres Jr. ug Rod Maloy.

Si councilor Julius P. Alegado, ang municipal council’s committee chairman on tourism, maoy presidente sa Fiesta Executive Committee.  (BANAT)