7-0, tuyo sa UV Lancers

CEBU, Philippines - Lab-as pa gikan sa ilang sikit nga kadaugan batok sa University of San Jose-Recoletos (USJ-R) Jaguars, 80-77, ang nine-time champion University of the Visayas (UV) Green Lancers nagpanikad na nga mosalida og usab uban ang paglaum nga mokulit og 7-0 elimination round sweep karong gabii sa dihang ilang harungon ang higpit nga karibal Southwestern University (SWU) Cobras sa main game sa 10th Cebu Schools Athletic Foundation, Inc. (CESAFI) diha sa Cebu Coliseum.

Usa si Ralf Olivares nga nakasalbar sa Lancers tungod kay kuwatro puntos lang unta siya sa wala pa siya mo-iskor og laing sagunson nga kuwatro puntos sa nahabiling uno minuto sa duwa nga maoy nahimong yawi sa kadaugan kay nainat ang ilang labaw ngadto sa 79-75 sa katapusang 19.9 segundos.

Ang Jaguars, kinsa nabiyaan og tres puntos sa nahabiling 9.3 segundos dihang si Phil Mercader mi-iskor og split charities, 80-77, aduna untay higayon nga ihatod ang duwa ngadto sa overtime, apan si Jun Lapiz misipyat sa iyang katapusang tirada gikan sa three-point area sa wala pa mohuni ang buzzer. Napunit pa gyud ni Jason Nudalo ang bola, apan ang iyang kinawat-kawat nga itsa natapalan ni Mercader.

Tungod sa maong kapildihan, padayon karong nagping-it ang Jaguars, kinsa nagtangag na og 1-5 nga baraha. Ang ilang katapusang higayon aron malikayan ang labing ubos nilang rekord sa kasaysayan sa 10 na ka tuig nga CESAFI mao ang pagdaog sa walay daog nga University of Southern Philippines Foundation (USPF) Panthers ugma.

 Si Adrian Lao maoy nangu sa 6-0 nga Lancers sa iyang 12 puntos, samtang si Mercader midugang og 11 puntos. Si Jerome Silva ug ang rookie center nga si Rene Jun Saycon miamot og 10 puntos matag usa.

Ang nabuntog nga Jaguars gipangulohan sab ni Kurt Amores pinaagi sa iyang 17 puntos, gisundan ni Gian Carlo Albarillo nga adunay 15 puntos, samtang sila si Abulaiz Suliman ug Lapiz adunay 13 ug 11 puntos matag usa.

PUNTOS MATAG USA

UV (80) - Lao 12, Mercader 11, Silva 10, Saycon 10, Cincoflores 9, Olivares 8, Delantar 5, Villanil 3, Avillanoza 2, Rios 2, Perolino 2

USJ-R (77) - Amores 17, Albarillo 15, Suliman 13, Lapiz 11, Nudalo 6, Munez 6, Abing 5, Bibera 4   (BANAT NEWS)