CEBU, Philippines - Ang Serbian player nga si Nenad Krstic kinsa maoy sentro sa Oklahoma City Thunder sa NBA, gisikop sa kapolisan apan wala madugay gibuhian ra usab sa kapolisan human siya malambigit og kasamok kaniadtong Biyernes sa gabii diin misangpot sa sinukmagay ang duwa tali sa Serbia ug Greece.
Ang gubot nahitabo sa kataposang duwa sa Acropolis tournament, ug gibiyaan na lang sa mga tawo sa kataposang 2:40 ang nahibiling oras ug ang Greece naglabaw og usa ka punto.
Nahitabo ang sinukmagay may usa ka semana na lang sa dili pa ang World basketball championship didto sa Turkey ug misanong ang FIBA nga mohimo’g imbestigasyon sa maong kaso.
“This shouldn’t have happened,” matod pa sa Serbian coach nga si Dusan Ivkovic, kinsa mao na unya’y mahimong coach sa Greek team nga Olympiakos sunod season.
Matod pa ni coach Ivkovic, “Relations with the Greeks are now very bad.”
Nakuratan ang may gibana-banang 5,000 ka basketball fans didto sa Athens Olympic Arena samtang nagtan-aw sa mga players gikan saduha ka habig nga nagsinukliay ug kinumo ug mga patid sulod sa korte hangtod na didto padulong sa agianan sa ilang dressing rooms.
May duha ngadto sa tulo ka fans nga nakit-an nga miambit sa maong away apan dali kaayong giguroy padulong sa gawas sa arena.
Nagsugod ang away dihang ang forward sa Greece nga si Antonis Fotsis mihulga sa Serbian guard nga si Milos Teodosic human ang nauwahi mi-foul kaniya.
Si Krstic kalit nga mibitad kang Fotsis gikan sa iyang liog ug nagkupot sa tutonlan ug milabay pa gyud og lingkoranan ngadto kang forward Sofoklis Schortsanitis kinsa gusto sab moatubang kaniya.
Hinoon, ang lingkoranan didto mo-igo kang Yannis Bouroussis, kinsa wala makaduwa tungod sa piang sa kamot hinungdan nga nagkadugo ang walang bahin sa ulo ni Bouroussis.
Ang duha ka teams na-uwang ra sab gihapon didto na gawas sa korte.
Si Prosecutor Costas Simitzoglou sa Greece, mipagawas kang Krstic samtang gi-imbestigar pa ang maong hitabo. Mga imbestigador gikan sa Greece’s sports violence squad maoy mosusi sa video footage sa maong duwa ug mokuha’g mga pamahayag gikan sa mga saksi sa dili pa sila mopagawas og desisyopn kung angayan bang ikiha si Krstic.
Si Krstic mibalik ra usab ngadto sa iyang hotel human siya gibuhian ug molarga na gikan sa Athens padulong sa Belgrade karong adlawa apan ang kinatibuk-ang Serbian team nag-una na’g pauli kay kaniya.
“I don’t know the rules, but I hope I won’t be punished,” matod pa ni Krstic ngadto sa Serbian media. “An (act of) stupidity was committed, and I hope they will not punish us. The Greeks started the brawl, there were no guards and the (Greek) fans entered the court, ” padayon pa ni Krstic.
Ang FIBA secretary general nga si Patrick Baumann nagkanayon nga ang international basketball federation mohimo’g kaugalingon nga imbestigasyon kalabot sa maong hitabo ug susihon ang nahimong kagubot.
Si Baumann mi-ingon “FIBA will take whatever steps are necessary against any individual player found to have been involved in this shocking incident.” “FIBA wishes to make it clear that it will not hesitate from taking the strongest possible action against any individual found to have brought the sport of basketball into disrepute.” (BANAT)