Simpolang 4-0 na sa FYA

CEBU, Philippines - Nagkinahanglan una ug singko minutos nga overtime ang Simpolang Barbecue Haus sa wala pa nila hingpit gipadaplin ang CRV aron maka-ipsot ngadto sa 104-101 nga kadaugan alang sa ilang sagunson nga ikatulong daug sa nagpadayong 2nd F. Llamas Youth Association (FYA) basketball tournament kaniadtong Huwebes sa gabii didto sa Vicente Memorial Gym sa barangay Punta Princesa, ning dakbayan.

Guston unta sa ilang playing coach nga si Noel Medalle nga tabangan ang nagkalisod niyang team apan inay moamot ug daghang puntos, igo lang siyang naka-iksor ug dos puntos tungod kay na-ejected siya sa sayong bahin sa first period tungod sa pagsige og reklamo sa pisikal kaayong depensa nga gipahamtang sa CRV ug gitawagan og duha ka technical fouls.

Bisan gani ang ilang Sportsmanship Awardee sa miaging tuig nga si Ryan Villaver napugos na gyud ug reklamo kay wala na siya maka-uyon sa mga kusog nga hapak nga iyang nadawat. Ang sukdanan sa sportsmanship mao ang player nga walay absent, dili reklamador ug wala makadawat bisan og usa ka technical foul atol sa usa ka nagpadayong lega.

Apan bisan pa niana, wala gihapon kini makapiog ni Villaver aron pangulohan ang Simpolang sa iyang 23 puntos kinsa nagsolo na karon sa liderato sa ilang 3-0 nga baraha.

Mas gipakita sab sa Simpolang ang ilang teamwork kug itandi sa CRV tungod kay upat sa ilang kauban ang mibahug sab og double figures.

Ang 1-1 nga CRV nag nakigtabal karon sa Kharoz ug sa Lauron & Rolly, gipangulohan ni Janus Abellana sa iyang 27 puntos ug sila si Rovel Tabar ug Dondon Cadungog miposa ug 24 ug 20 puntos matag usa apan gawas kanilang tulo, wala nay laing kauban nga mi-iskor ug kapin sa otso puntos.

Sa sayo pa, ang Kharoz mikulit sab sa labing una nilang daug dihang ilang gilampurnas ang Angelica, sa iskor 99-75.

Si Chris Llegunas maoy nangu sa Kharoz pinaagi sa iyang 26 puntos ug si PJ Cabanday midugang ug 20 puntos.

Si Ranel Patalita maoy nangu sa Angelica huan siya mokadlit ug 19 puntos.

Puntos matag usa

First Game:

Kharoz (99)— C. Llegunas 26, Cabanday 20, Atuel 14, Dacayana 13, Anes 6, Suba 4, Macaser 2, Quita 2, Archel 2, Trinidad 2, Dela Cerna 2

Angelica (75)— Patalita 19, Cabanday 18, Basaolo 13, Garcia 10, Rama 8, Cuyme 4, Enriquez 2

Second Game:

Simpolang (104)— Villaver 23, Labrador 16, Tabares 15, Aglipa 14, N. Laborte 13, Gelbolingo 10, Antiporta 7, Canete 6, Medalle 2

CRV (101)— Abellana 27, Tabar 24, Cadungog 20, Sabalande 8, Abella 8, Navarro 5, Laurente 2, Pacunbas 2, Medalle 2, Pacana 2 (BANAT NEWS)