Solmeat mitagak sa Ave Maria

CEBU, Philippines - Wala moila og gaba ang Solmeat dihang ilang gipaluhod ang Ave Maria Sanctuary Park, 108-94 aron makuha ang katapusang lingkoranan sa finals sa LLBA Rollway Cup 2010 basketball tournament diha sa Villa Magallanes gym sa Lapu-Lapu City.

Apan nangayo pa kini og overtime sa wala pa nila hingpit maangkon ang muna sa ginhawa nga kadaugan.

Ang Ave Maria mopaingon na untang motugkad sa hawanan sa himaya human kini milabaw og dos puntos, 80-78, apan si Kakay Versoza mibuhi sa iyang mahinungdanon nga itsa aron tablahon ang duwa, 80-all sa katapusang 18 segundos.

Gihatagan unta'g laing pang chance ang Ave Maria nga modaog dihang ila ang ball possession sa daginutong segundos, apan nakahimo sila'g turnover hinungdan sa overtime.

Sa dugang singko minutos, wala na makaugpo ang Ave Maria ug mao na kanunay ang naggukod sa Solmeat, kinsa agresibo na kaayong nakaduwa hangtod nga nahurot ang oras sa duwa.

 Usa sa nakatampo sa kapildihan sa Ave Maria mao ang pag-graduate sa tulo niini ka players sa tunga-tungang bahin sa final period.

Si Alan Larazaga mihansak og 30 puntos aron pangulohan ang Solmeat ni team owner Sol Bascon. Si Versoza mihabwa og 20 puntos, gisundan ni Diego Tampus nga adunay 18 puntos.

Ang Ave Maria ni team owner Raffy Senining gipangulohan sab ni Ronron Aying pinaagi sa iyang 23 puntos, samtang sila si Dindo dela Rama ug Ondo Cadungog parehong mikandos og 16 puntos.

Ang Solmeat maoy moharong sa nagpaabot nga Cavs alang sa korona karong Biyernes, samtang ang Ave Maria ug Ace Penzionne maoy mag-ilog alang sa ikatulo nga dapit.

Puntos Matag Usa

SOLMEAT (108) - Larazaga 30, Versoza 20, Tampus 18, Temporada 12, Godinez 9, Manilag 8, Casio 7, Bascon 4

AVE MARIA (94) - R. Aying 23, Dela Rama 16, Cadungog 16, G. Aying 10, Guido 10, Dorig 8, Nadado 5, Bergado 3, Baricuatro 3. – BANAT NEWS