Ave Maria may purohan pa

CEBU, Philippines - May purohan pa ang Ave Maria Sanctuary Park nga mosud sa finals human nila gipilde ang twice-to-beat Solmeat, 95-88 sa semifinals sa LLBA Rollway Cup   diha sa Villa Magallanes gym sa Lapu-Lapu City.

Samtang hingpit na nga miabante sa finals ang Cavs pinaagi sa pagpilde sa Ace Penzionne sa iskor nga 70-66.

Si Archie Ompad maoy topscorer sa Cavs sa iyang 16 puntos, samtang ang natagak nga Ace gipangulohan ni Buldog Ybañez nga adunay 27 puntos.

Si coach Billy Nadado sa Ave Maria wala mokompiyansa ug iyang gidungan sa pagpasulod ang labing sinaligan niyang mga batos hinungdan nga ilang nakontrolar ang kinatibuk-ang duwa.

Si Ondo Cadungog milansang og 17 puntos aron pangulohan ang Ave Maria. Si Ronron Aying miamot og 16 puntos, si Dindo dela Rama miabuno og 15, samtang sila si Roger Bergado ug Dorig pulos mitampo og 14 puntos. Ang naparot nga Solmeat ni team owner Leo Bascon gipangulohan ni Diego Tampus sa iyang 21 puntos. Ang Ave Maria ug Solmeat magtinaktakay karon sa alas-8 sa gabii diin ang modaog maoy   moharong sa nagpaabot nga Cavs alang sa kampiyonato.  – BANAT NEWS