Warriors gibuntog sa Webmasters

CEBU, Philippines - Miwadwad og maayo ang losing finalist sa miaging tuig University of Cebu (UC) Webmasters sa second half diin nakabiya sila'g daku aron pagpukan sa undermanned University of San Carlos (USC) Warriors, 89-65 sa nagpadayong 10th Cebu Schools Athletic Foundation Inc. (CESAFI) sa miaging gabii diha sa Cebu Coliseum.

Napanglantawan nang daan nga modaog ang Webmasters pinaagi sa hulga sa Warriors nga magpa-forfeit na lang sa ilang duwa kun dili tugotan sa pagduwa ang pipila nila ka players nga adunay kadudahan o kuwestiyonabling rekord. Apan wala’y nahimo ang Warriors tungod kay wala mopabor nila ang CESAFI Board ug napugos sila’g duwa sa mando ni USC Vice President for Administration Rev. Fr. Ernesto Lagura, SVD.

Tungod lagi kay pito lang ka players ang nakaduwa,   nakabsan og hangin ang Warriors ug wala na makasustenir ang ilang Magnificent 7 sa second half. Ug bisan pa sa ilang kapildihan, gilamano gihapon ni CESAFI commissioner Felix O. Tiukinhoy, Jr. si coach Mike Reyes aron pahalipayan sa iyang pagduwa ug pagpakita sa tinuoray nga sportsmanship ug aron usab dili mahimong ngil-ad ang CESAFI sa mga mata sa publiko.

Nakadugang sa kahuyang sa Warriors mao ang wala pagduwa nilang Giovanni Padillo ug Michael Cantonao. Si Padillo nakaangkon og piang sa iyang tuong kamot atol sa ilang praktis, samtang si Cantonao gitaptan og chicken pox o tipdas.

Ang 6-foot-9 skycraper nga si June Mar Fajardo ug sophomore guard Gerald Ampoon maoy topscorers sa Webmasters nga parehong mitusak og 17 puntos, samtang ang licensed gunner nga si Robinson Mohammad ug si Daniel Enriquez pareho sab nga miposa og 11 puntos.

Maayo sab nakaduwa ang rookie point guard nga si Quinton Brian Heruela, kinsa nakadugang og kusog sa backcourt sa Webmasters. Si Heruela nakaduwa sa UV Baby Lancers dihang niduwa pa siya sa juniors, apan mitapon sa Webmasters niadtong summer.

Nakapanimaho na og kadaugan ang Webmasters human sila miposte og 27 puntos nga bentaha, 86-59 sa katapusang dos minutos sa duwa.

Si Sam Hermosa mitira og 24 puntos alang sa Warriors, samtang sila si Joven Cid Cortes ug Robert Gines Codilla nagkumboya og 25 puntos sa maong kapildihan.  

Puntos matag usa

UC (89) - Fajardo 17, Juliane 17, Mohammad 11, Enriquez 11, Pao 8, Bercede 6, Magallanes 5, Ampoon 4, Heruela 3, Batua 3, Cabrea 2, Cueva 2

USC (65) - Hermosa 24, Cortes 13, Codilla 12, Otida 6, Santos 5, Panerio 3, Uy 2 

(BANAT NEWS)