UC Webmasters nagpanikad na sa ika-15 nilang korona sa Milo Little Olympics

CEBU, Philippines - Nagpanikad na ang athletic powerhouse University of Cebu (UC) Webmasters sa ilang kampanya sa ika-15 nilang sunod-sunod nga kampiyonato sa Visayas Finals sa 2010 Milo Little Olympics nga mosikad karong Agosto 6 didto sa Cebu City Sports Center (CCSC).

Si UC athletic director   Bernard Ricablanca nagkanayon nga usa ra ang ilang tumong ug kini mao ang paghari ug masubli ang nahimo nilang kalamposan sa miaging tuig nga kompetisyon nga giumol sa Nestle Philippines.

“Milo Little Olympics is one of the events that we always look forward to because every year is a challenge for our team. Whether we could still maintain our standing or we might fail, we always motivate our athletes to excel in all aspects,” matud ni Ricablanca.

Malaumon si Ricablanca nga makakabkab sila og daghang gold medal sa paborito nilang track and field event tungod kay grabe ang ilang gihimong pagpangandam uban ang ilang mga bagitong tracksters. Dugang pa niya nga lakip sa ilang gipunting nga maka-gold mao ang table tennis, badminton ug chess.

Ang Milo Little Olympics mogamit na og points system bugti sa “traditional Olympic medal count” aron pag-ila kun kinsa ang maghari sa maong torneyo. Gumikan niini ang UC mobala og mga tang-an nga atleta sa tanang duwa sa duha ka weekend nga kumbati sama sa athletics, badminton, chess, football, gymnastics, lawn tennis, scrabble, sepak takraw, swimming, table tennis, taekwondo ug volleyball.

Dili na sama sa miaging tuig nga torneyo sa elementary ug high school students, ang swimming ug taekwondo mosagop og number events sama sa Palarong Pambansa.

Si MLO event organizer ug CCSC manager Ricky Ballesteros, nagkanayon nga ilang gipang-usab ang ubang mga lagda sa points system ug ingon man ang numero sa mga magduduwa sa racket sports.

Sa laing bahin, ang pagpili sa most outstanding athletes (MOA) sa regional finals giwagtang na ug adto na lang sila mopili og MOA atol sa national finals.

“We will no longer declare most outstanding athletes during the regional finals since MLO has the national finals already. It’s more challenging and it would even bring more pride and honor to the athletes if they will be chosen among the best athletes in the different regions in the country,” sumala pang Ballesteros.

Moabot sa 44 ka atleta ang   makadawat sa MOA award tungod kay inay usa ka outstanding athlete matag sporting event, aduna nay male ug female MOA awardees sa matag dibisyon. 

Ang mga winners sa   National Capital Region, Luzon, Visayas ug Mindanao regional finals moabante sa 2nd MLO National Finals nga gikatakda karong Oktubre 22-24 didto sa Cagayan de Oro City.  - BANAT NEWS