Gilatigo sa Lancers

CEBU, Philippines - Human wala makatunga sa unang duwa   kay nataligam-an nila ang petsa sa duwa, ang University of the Visayas (UV) Baby Lancers nibangon ug milatigo sa University of San Carlos (USC) Warriors, 78-58    sa nagpadayong aksyon sa 10th Cebu Schools Athletic Foundation, Inc. (CESAFI) kagabii diha sa Cebu Coliseum.

Ang Baby Lancers, kinsa napilde sa Cebu Institute of Technology (CIT) Wildkittens pinaagi sa default niadtong Domingo, mitapak sa ilang lubog nga dinuwaan sa unang-tunga ug mipabuhagay sa ilang mga opensa sa katapusang kuwarter aron pagposte og 23 puntos nga bentaha sa katapusang dos minutos sa duwa, 78-55.

Si Vincent Mendoza mikiat og maayo sa katapusang kuwarter, samtang si Michael Smith maoy mipas-an sa opensa sa ikaduhang kuwarter nga maoy nihatag sa unang daog sa Baby Lancers. Sila si Mendoza ug Smith parehong mibugha og 21 puntos, samtang si Alwin Aguirre misansan og 14 puntos.

Sa sayong bahin sa duwa, ang Baby Warriors maoy unang nakatusik og labaw 20-14, apan ang Baby Lancers milusad og 16-0 run aron pagposte og 32-20 nga bentaha. Sukad niadto nagkaguliyang na ang opensa sa Baby Warriors.

Ang naparot nga Warriors gipangulohan ni Harvey Palapar, kinsa miburak og 23 puntos diin ang 10 puntos naggikan sa ikatulong kuwarter.

Sa laing bahin, wala madayon ang plano sa USC Warriors nga pag-forfeit sa ilang duwa tali sa University of Cebu (UC) Webmasters tungod kay mitunga   sila uban ni USC president Fr. Ernesto Lagura, SVD.

Puntos Matag Usa

UV (78) - Mendoza 21, Smith 21, Aguirre 14, Suan 8, Flores 7, Legarde 6, Nuñez 6, Cenita 4, Dennison 2, Undaloc 2

USC (58) - Palapar 23, Romaguerra 10, Uy 8, Guardiario 6, Malana 4, Jaca 4, Pajantoy 2, Bacaltos 1. - BANAT NEWS