CEBU, Philippines – Mibalik og dagan sila si Kenyan Simon Losiaboi ug Mary Grace delos Santos aron birahon ang trono isip hari ug reyna sa Cebu running scene human sila midominar sa tagsa-tagsa nila ka dibisyon sa 10K Open sa St. Ignatius Day Run gahapon didto sa Sacred Heart School-Ateneo de Cebu (SHS-AdC) sa Canduman, Mandaue City.
Kahinumduman, si Losiaboi napalta pagdagan sa Run for Kids niadtong miaging Domingo tungod sa injury sa iyang tiil, samtang si Delos Santos wala usab midagan kay iyang gipalabi ang GenSan leg sa 34th National Milo Marathon diin siya maoy kampiyon.
Ang Kenyan missionary nga si Losiaboi maoy nag-una sa men’s class uban sa oras nga 33:55.76, gisundan ni Riez Enriquez alang sa ikaduhang dapit sa oras nga 34:27.33 ug Rober Daan sa ikatulo sa iyang 34:47.02.
Gipakita usab ni Delos Santos ang iyang kapaspas ug milabang kini sa finish line sa oras nga 38:05.03. Si Mareeis Ramirez nga mi-oras og 44:59.28 maoy ikaduha, samtang si Melinda Ponce nga adunay 51:43.12 maoy mikapyot sa ikatulo nga dapit.
Sa iyang bahin, ang notadong Running Eye Doctor nga si Yong Larrazabal maoy nag-una sa SHS-AdC alumni division sa iyang best time 43:56.55. Iyang mga runners up mao sila si Arnold Go (44:10.69) ug Manuel Zosa III (48:13.41).
Gipilde ni Philip Duenas (15:52.12) si Joel Delposo (15:55.26) alang sa korona sa 5K category, samtang si Jory Ycong maoy third placer sa oras nga 16:01.09.
Sa 5K division, si Mary Joy Tabal maoy reyna sa women’s division sa oras nga 18:32.05, uban nila ni Joeyry Lee (19:52.99) ug Crizel Diongson (20:32:83) nga maoy mipahiluna sa ikaduha ug ikatulo nga dapit. (BANATSPORTS)