Derby ace abante sa best-of-7 semis

CEBU, Philippines - Miagi pa og lisud nga overtime ang Derby Ace Llamados sa wala pa nila makuha ang luna sa semis sa ilang, 105-100, nga kadaugan batok sa Rain or Shine Elasto Painters sa "do-or-die" game kagabii didto sa Araneta Coliseum.

Miabot ngadto sa 20 puntos ang labaw sa Llamados sa first-half, apan wa damha nga nagukod kini sa Painters nga milusad og rally sa third period aron inaug ang labaw sa uno punto, 83-84, sa 5:09 sa third period.

Bisan paman og wala gipasulod ang ilang import nga si Rod Nealy kinsa nabutang sa foul-trouble, mipakita sa ilang kabangis ang Painters sa pagpangulo sa tandem nila ni Gabe Norwood ug Sol Mercado kinsa mipasulod sa iyang tres sa katapusang 2:30 nga maoy misakmit sa labaw, 86-85.

Ang tip-in ni Eddie Laure ang miinat sa labaw ngadto sa tres puntos alang sa Painters, apan wala usab magpapugong ang import sa Llamados nga si Tony Washam kinsa mibugwak og 14 sa iyang 49 puntos sa final period aron tablahon ang iskor, 90-all.

Nakaangkon og kahigayunan si Mercado nga daugon ang duwa, apan mikagar ang iyang tres. Atol sa extra four minutes sa overtime, mihinay ang dagan sa duwa, samtang ang tandem nila ni James ug Roger Yap mipasulod og upat sa unom ka sunod-sunod nga free-throw nga maoy mihatud sa Llamados sa kadaugan.

Human sa init niya nga scoring sa final period, namugnaw si Mercado ug wala na madugangi pa ang iyang 23 puntos. Si Norwood maoy top scorer sa Painters sa iyang 25 puntos.

Ang Llamados makigharung karon sa second-seeded San Miguel Beermen sa "best-of-seven" semifinals series karong Miyerkules. (BANAT NEWS)