CEBU, Philippines - Wala pa gihapon mamansahi ang rekord sa Threesome/Stickerworld dihang midaog na sab kini pinaagi sa paglubong sa Savers Home Depot, 74-55, samtang gipilde sab sa AMBL/ACDC Mang Inasal, 89-87 sa nagpadayong JCI 15th Jaycees Basketball Association (JBA) Metro Cebu Uptown Cup didto sa City Sports Club-Cebu gym sa Cebu Business Park. Ang Threesome nga nagbitbit og 4-0 nga baraha, gipangulohan ni Christian Tiongco pinaagi sa iyang 11 puntos, samtang sila si Oliver Go, Dexter So ug Glen Besanes midunga’g 10 puntos matag usa.
Si John Sulay mibalik na sa aksiyon gikan sa iyang pagkapiang atol sa opening day diin mihipos kini’g 15 puntos, apan wala kini makapausab sa resulta sa duwa tungod sab kay wala kaayo makaugpo ang uban niyang teammates hinungdan nga wala gyud kini makatilaw og daog sud sa tulo ka duwa.
Sa laing aksiyon, si Franco Te, ang anak ni Dr. Boy Te mibahog og 18 puntos aron pangulohan ang AMBL/ACDC. Miabag sab sila si Baltaire Balangauan ug Jimbo Noel nga nagkumboya’g 29 puntos. Ang ilang bigman nga si Chito Hernandez ug si Fritz Sullano mitampo’g 12 puntos matag usa.
Si team manager Allan Lim mipugnit og 10 puntos alang sa iyang team nga naghupot na og 2-1 nga baraha.
Ang init nga tandem nilang Montoy Singson ug Opel Cabaltera wala makapalisang sa ABML tungod kay bisan pa sa ilang 21 puntos matag usa, nakahimo gihapon sila pag-eskapo bitbit ang dos puntos nga kadaugan.
Si Bronson Peña midugang og 13 puntos alang sa Mang Inasal, kinsa midailos ngadto sa 1-3 nga baraha.
Puntos Matag Usa
Unang duwa:
Threesome/Stickerworld (74) - Tiongco 11, So 10, O. Go 10, Besanes 10, Conde 9, Flores 8, Rosal 5, Tecson 5, C. Go 4, Lee 2
Savers Home Depot (55) - Sulay 15, Laguna 13, Sy 8, Dela Peña 4, Polo 4, Baladya 3, Chu 3, Tiongco 2
Ikaduhang duwa:
AMBL/ACDC (89) - F. Te 18, Balangauan 15, Noel 14, Hernandea 12, Sullano 12, Lim 10, Seno 3, Manal 3, Estella2
Mang Inasal (87) - Singson 21, Cabaltera 21, Porras 17, Peña 13, Barreto 9, Lazaro 4, Nieves 2. – BANAT NEWS