CEBU, Philippines - Tumong ug tuyo ni PBA superstar Arwind Santos mao ang pagdaog sa labing una niyang PBA title uban sa San Miguel Beermen.
Sa iyang pagbisita dinhi sa Sugbu ang kanhi two-time UAAP MVP nga si Santos nagkanayon nga mapasalamaton siya sa gihatag nga kahigayonan sa San Miguel nga moduwa sa ilang koponan. Matud niya nga iyang buhaton kutob sa iyang makaya aron abagan ang iyang koponan sa nagpadayong 2010 PBA Fiesta Conference.
“Yun una ko talagang gustong makamit ay manalo kami nang championship kasi sa team naming ngayon ako na lang ang hindi pa nag-champion. Saka na lang seguro yung MVP,” matud pa ni Santos.
Ang 6-foot-4 nga si Santos unang misulod sa liga isip second over-all pick sa Air21 Express niadtong tuig 2006, apan kalit nausab ang dagan sa iyang karera niadtong Hulyo sa miaging tuig human siya gi-trade ngadto sa San Miguel bugti nila ni Marc Pingris ug Ken Bono.
Gikan didto, si Santos nahimong usa sa leading scorer sa San Miguel nga kasamtangan karong nahimutang sa ikaduhang dapit sa standing bitbit ang 12-5, win-loss record sunod sa league leader nga Talk N’ Text nga adunay 14-3 nga baraha.
Karong Sabado, suwayan pagkandado sa San Miguel ang luna alang sa semifinals sa ilang pakigsangka batok sa Alaska Aces sa PBA "out-of-town" game didto sa Lamberto Macias Sports and Cultural Center sa Dumaguete City. (BANAT NEWS)