Losiaboi hari sa 10th DyAB Run

CEBU, Philippines - Walay nakapugong sa Kenyan runner nga si Simon Losiaboi human siya mosakmit og laing titulo sa 15k men’s open sa 10th DyAB Kapamilya Run kagahapon didto sa Asia Town I.T Park sa Brgy.Apas, ning dakbayan.

Si Losiaboi kinsa nagduha-duha sa pagsalmot sa maong lumba, milabang sa finish line sa oras nga 52:43.13, gisundan ni Arvirg Busa sa ikaduhang dapit sa oras nga 53:45.14 ug Adonis Singson kinsa mitapos sa lumba sa oras nga 54:10.20 alang sa ikatulong luna.

Sa pakighinabi sa Banat News, si Losiaboi mibutyag nga dili na unta siya musalmot sa lumba, apan napugos siya human usab mabiktima siya sa laing pagpangawat sulod mismo sa iyang giabangang lawak diin nakuha ang iyang cellphone ug kapin sa P6,000 nga salapi nga mao unta ang iyang gamiton aron makauli didto sa iyang nasud sa Kenya.

Migawas nga fourth placer si Joebert Carolino sa oras nga 51:11.37, samtang ang boksidor gikan sa Cebu City Sports Center (CCSC) stable nga si Ian Refuela mipahiluna usab sa ikalimang dapit sa oras nga 58:56.24.

Sukwahi sa nag-unang taho, misalmot usab si Mary Grace Delos Santos diin gisakmit niya ang titulo sa women’s open sa oras nga 59:28.58 uban sa iyang mga runner-ups nga sila si Mary Joy Tabal sa SWU sa oras nga 1:03:38.68 ug Madelyn Carter kinsa mihuman sa lumba sa oras nga 1:05.30.25. Wala usab magpauwahi ang triathlete nga si Lhoriz Echavez kinsa misakmit sa 6th place sa oras nga 1:16.40.23.

Sa laing bahin, ang garbo sa University of Southern Philippines Foundation (USPF) nga si Joel Delposo mao usab ang nanghawud sa 7k men’s open sa oras nga 24:09.41, gisundan nila ni Ian Bernido (24:09.41) ug Michael Estrera (25:09.53) sa ikaduha ug ikatulong dapit.

Midaug sa 7k women’s open si Crizel Diongson sa oras nga 30:23.43, nagukod kaniya si Joeyry Lee isip second placer sa oras nga 30:36.02 ug Aiza Suwaybaguio sa oras nga 31:02.17 sa ikatulong dapit.

Gawas sa aksiyon sa 15k ug 7k division, gatusan usab ka mga fun-runners ang nanagan alang sa 1.5k fun run category.

Gipasiugdahan sa ABS-CBN ug DyAB, ang maong lumba magsilbe usab nga fund raising campaign alang sa pagpaayo sa mga nagusbat nga classrooms sa mga pampublikong eskwelahan dinhi sa Sugbu. – BANAT NEWS