CEBU, Philippines - Migawas ang tinuoray nga abilidad sa mga Sugbuanong MMA fighters human sila mihakot og 33 ka medalya sa bag-o lang natapos nga 2010 Pan Asian Gi and No-Gi International Competition didto sa SM Mall of Asia sa kaulohan.
Ang Cebu-based Team Deftac mipakita sa ilang katakus sa Brazilian Jiujitsu pinaagi sa pagsakmit og siyam ka gold, 10 ka silver ug 14 ka bronze medals batok sa mga MMA fighters gikan sa nagkalain-laing kanasoran.
Mihatag og medalya alang sa Team Deftac mao sila si Robert Mellana ug Ram Ananda sa blue belt division, Gerb Inajada, Jiggy Canizares, Keeno Jingco ug Vaughn Donayre sa white belt class, Ren Anthony Lao sa juniors division ug Carl Rizon sa kids category.
Ang MMA tournament gisalmotan sa kapin 300 ka mga martial artists gikan sa Australia, Singapore, China, Hong Kong, Guam, Japan, Malaysia, Thailand, Vietnam ug Borneo. – BANAT NEWS