Siso napilde ni Tierro

CEBU, Philippines - Yano kaayo nga gipilde ni Patrick John Tierro ang garbo sa Sugbu nga si Bernardine 'Niño' Siso sa 3rd Cebuana Lhuillier Men's Open Tennis Championship kagahapon didto sa Baseline Sports and Recreation Center.

Si Tierro mi-iskor og 6-2, 6-0 aron pag-abante sa sunod nga hugna.

Laing Sugbuanon nga si Kennex Abadia, kinsa nakabaton og wild card entry, wala sab buligi'g maayong kapalaran dihang napukan kini ngadto ni Alexander Lazaro, 7-6, 6-4.

Ang no. 3 qualifier nga si Israel Abarquez maoy ikatulong Sugbuanon nga manamilit niining PHILTA Group B event human miyukbo ngadto ni Rocky Paglalunan sa Zamboanga, 6-3, 6-3.

Sa laing bahin, si Ralph Barte sa Davao midemolis ni Rhoel Capangpangan sa Butuan, 6-1, 6-0, samtang si Gilbert Estrada sa Surigao nakasugakod sa makutas nga duwa batok ni Mark Anthony Alcoseba sa Davao (6-7(5), 7-6(2), 5-0.

Sila si Kim Ivor Saraza ug Juvan Divinagracia miabante sab ngadto sa sunod hugna human sa ilang kadaugan batok sa tagsa-tagsa ka kaatbang. Si Saraza sa Manila mipukan ni Ruel Rubillar sa Davao, 6-4, 6-4, samtang si Divinagracia mimakmak ni Antonio Sagansay sa Bacolod, 6-2, 6-1. – BANAT NEWS