Flores misakmit duha ka korona

CEBU, Philippines - Mirehistro'g double championship si John Flores sa 5th leg sa 2010 MS Motosuit Motocross Series nga giuloha'g "2nd Mayor Celestino Martinez Jr. Motocross Cup niadtong miaging adlaw didto sa Bogo City.

Si Flores, kinsa napakyas pagdaog og kampiyonato atol sa ikaupat nga leg namawi ug iyang gidominar ang expert ug intermediate divisions.

Ang sikit kaayong nagsunod ni Flores nga si Wilbert Marano nidaog sa novice open production class.

Si Siegfred Ornopia sa Keiz BJ Motors, nga usa sa mga midisenyo sa racetrace wala gihapon matandog ug nagpabiling hari sa executive-A division.

Ang executive-B gidominar ni Noli Rom sa Danao-based MTS Racing, samtang si Sergio 'Bioman' Chua mao ang nanghawod sa executive-C.

Lain pang nidaog og korona naglakip ni Dongkey Sanchez sa open enduro, Jay Sanico sa local enduro, BJ Pepito sa pewee category, Denmar Supatan sa mini class ug Andan Beriso sa underbone category.

Si Jonas Pestaño nidaog sa "Wanggits" category sa special event ning maong lumba nga gipaluyohan sa Castrol Power One, Dr. Felipe Montejo, Sta. Cruz Dakit Agrivet, Global Fores & Remittance Co. Inc., Galing UK Shop, Hon. Yoyong Almirante ug Rey Goco.   (BANATNEWS)