Domingo milampos pagtumba ni Melendez

CEBU, Philippines - Milampos si Michael Domingo sa ALA Boxing Gym sa iyang misyon human niya gipaluhod si Luis Melendez sa ikaduhang round sa "Hangad na Paghihiganti" niadtong Domingo sa gabii didto sa Waterfront Cebu City Hotel and Casino.

Nahimong emosyonal ang kalihukan kay sa wala pa sugdi ang away nilang Domingo ug Melendez may gihimong "special entrance" alang kang Gorres.

Grabeng pagmaya ang gibati ni Domingo kay dugay na kining naglungot-lungot nga mobawos ni Melendez, kinsa maoy miputol sa boxing career sa iyang suod nga higala ug stablemate nga si Gorres.

Wala mag-usik og panahon si Domingo ug gibombahan dayon niya ang ulo ug ang bodega sa hangin ni Melendez, kinsa nagpunga-punga pagpanagang sa nagpungasi nga mga kumo nga mitama sa iyang nawong.

Si Melendez hilom nga nagping-it sa kasakit sa mga suntok nga daw bato kagahi nga iyang naangkon ug wala na kaayo kini mobuhi'g mga suntok nga naghatag og pabor ni Domingo.

Sa second round, si Domingo mipatama na sab og laing makusog nga left hook sa bodega sa hangin nga nakapatumba ni Melendez sa oras nga 1:39

Si Melendez nga danag na ang panan-aw, misuway og barog, apan naiphan kini ni referee Gene del Bianco.

Ang away ni Domingo gipahinungod ngadto ni Gorres, nga nakapadugang sa iyang kaisog sa pakigsangka ni Melendez.

Daku sab og natabang ang iyang training didto sa Japan uban ni kanhi WBC bantamweight titlist Hozumi Hasegawa.

Sa supporting main event, si kanhi world title contender Jimrex Jaca mipatumba sab ni James Kimori sa Kenya sa oras 1:30 sa fourth round, samtang si Jason Pagara mitumba sab ni Romeo Jakosalem sa round 2.

Si James Bacon mimakmak ni Cerilo Espino, apan ang away tali nilang Kotsy Ebalang ug Rocky Sismundo gitabla.   (BANATNEWS)