Gorres mahimo untang labing maayong boksidor sunod ni Pacquiao
CEBU, Philippines - Gianugonan si Colombian trainer Osvaldo Martinez sa pagkadisgrasya ni Z 'The Dream' Gorres, kay iyang napanglantawan nga mosidlak pa og maayo ang bitoon niini ug mamahimong labing maayong boksidor sunod ni Manny Pacquiao.
Atol sa press conference sa “Hangad nga Paghihigante” fight card niadtong Biyernes gabii didto sa Waterfront Cebu City Hotel and Casino, ang inilang trainer ug manager ni Luis Melendez miingon nga nasubo kaayo sila sa nadangatan ni Gorres.
Nahulga ang kinabuhi ni Gorres dihang na-comatose human mataymingi sa kusog nga walop ni Melendez sa round 12 atol sa iyang "unanimous decision" nga kadaugan niadtong Nobiyembre 13 sa miaging tuig didto Mandalay Bay House of Blues sa Las Vegas.
Si Gorres kalit lang natumba pipila ka minutos human siya gibayaw nga mananaog ug gidala ngadto sa University Medical Center (UMC) diin didto gihimo ang operasyon aron makuha ang nabagtok nga dugo sa walang bahin sa iyang utok.
Sa maong away, nakita ni Martinez ang grabeng paningkamot ug determinasyon ni Gorres.
Bisa'g napilde ang iyang boksidor, mapasigarbuhon gihapon si Martinez tungod kay nabagat nila ang usa sa mga ngilngig nga boksidor sa bantamweight division.
Kun wala pa unta madisgrasya si Gorres, segurado unta siyang modaog sa WBO bantamweight title nga gihuptan sa Mehikanong si Fernando Montiel.
"Montiel would have been defeated by Gorres," matud ni Martinez. "Defense, technique, skills, Gorres has it all." (BANATNEWS)
- Latest
- Trending
