KCB aduna nay 4-0 sa Emil's Cup

CEBU, Philippines - Nagpabiling walay pilde ang Karl Customs Brokerage (KCB) ni team owner Nelson 'Dodong' Arnoco human nila gilubong ang SLAM dribblers, 86-73 aron paglansa'g 4-0 nga baraha sa Emil’s Cup 20 years old and below division didto sa Jerry Oberes compound open court sa Lipata, Minglanilla, Cebu.

Milabaw la'g uno punto ang KCB sa halftime, 44-43, apan gipahugtan nila ang ilang depensa sa second half nga nakaguba sa duwa sa SLAM, kinsa wala na makarekober human pabuthi'g 26-14 run ang KCB aron masakmit ang 13 puntos nga kadaugan.

Ang torotoy'ng point guard nga si Charles Arnoco maoy nagpatuman sa opensa, uban sa abag nilang Chars Gerson, Jay-R Catipay ug sa Nigerian nga si Rickcres Nwanaka.

Si Gerson maoy nangu sa KCB sa iyang 15 puntos samtang sila si Nwanaka ug Catipay miamot og 12 ug 10 puntos matag usa.

Ang SLAM, kinsa midailos ngadto sa 2-2 nga baraha, gipangulohan ni Guiler Reyes pinaagi sa iyang 12 puntos, gisundan ni Paul Robles nga adunay 10 puntos.

Puntos Matag Usa

KCB (86) - Geson 15, Nwanaka 12, Catipay 10, A. Doble 8, Aguirre 8, Fuentes 8, Jungoy 6, Lopez 6, Arnoco 4, Doble 4, Belocura 3, Monares 2

SLAM (73) - Reyes 12, Robles 10, Tabay 9, Cañada 8, Pardillo 7, C. Fernandez 7, Catabas 5, Antig 4, B. Fernandez 4, Avila 3, William 2, Pardillo 2. – BANAT NEWS