Secret Weapon ni Domingo

CEBU, Philippines - Masaligon si ALA Boy Michael Domingo nga modaog sa umaabot niyang away batok ni Colombian Luis Melendez karong Mayo 23 diha sa Pacific Ballroom sa Waterfront-Cebu City Hotel and Casino sa Brgy. Lahug, ning siyudad.

 Ang beteranong si Domingo nagkanayon nga andam na siya nga makighilam-osay og kumo ngadto ni Melendez ug salig siya nga modaog sa tabang sa iyang “secret weapon” nga si Z Gorres, kinsa maoy maghatag kaniya'g mga tips batok sa Colombian fighter.

Sa iyang bahin, si ALA Promotions President, Michael Aldeguer nagtuo nga dili moluntad og dugay ang maong away ug aduna gyu'y usa nila ni Domingo ug Melendez ang moligid ibabaw sa ring.

Si Melendez mahimong motapos sa away gamit ang usa ka solidong kumo, samtang si Domingo adunay iyang abilidad nga mopatumba ni Melendez pinaagi sa haguros nga kombinasyon.

Naila nga “Bruce Lee”, si Domingo (39-14-2,17KOs), mipukan na sa mga world-rated fighters sama nila ni

Jose Navarro, Ratanachai Sor Vorapin ug Miguel Roman.

Matud ni Domingo nga usa sa iyang inspirasyon aron modaog batok ni Melendez mao ang iyang suod nga higala nga si Gorres, kinsa nabiktima sa kabangis sa maong boksidor.

Si Melendez (26-4-1, 21KOs) maoy responsable sa pagkahunong sa boxing career ni Gorres.

Gawas ni Domingo, mosaka na sab og balik sa ring si Jimrex Jaca batok ni James Kimori sa Kenyan, Africa.

Ang boxing card nga uloha'g “Hangad na Paghihiganti” ipasalida sa ABS-CBN.

Sa dugang mga kalamboan, gipahibalo sa ALA Promotions nga nahurot na ang mga tiket sa VIP 1st row ug 2nd row.

Ang tiket mahimong mapalit diha sa ALA Promotions’ Office (032-2364611), ALA Gym sa Banilad Town Centre (032-4162011); Sports Exchange Bar & Grill sa Mango Avenue ; Sandtrap sa Ma. Luisa access road (032-3440063); Yayoy’s Grill ug AA’s Barbeque Grill sa A.S. Fortuna ug Lahug branch, USA Sports Boutique sa Ayala Center-Cebu, Bisaya Ispisyal Boutique sa Ayala Center ug USA Sports Kiosk sa Gaisano Mactan.  – BANAT NEWS