Lakers ug Magic 3-0 na

CEBU, Philippines - Naglawig na ngadto sa Western Conference finals ang defending champion Los Angeles Lakers human sila maka-ipsot batok sa host Utah Jazz, 111-100 atol sa Game 3 ug mikuha’g 3-0 nga abante sa ilang West semis didto sa EnergySolutions Arena sa Salt Lake City, Utah.

Samtang diriyot mapakgang ang Lakers sa ilang road game, mas misamot kamangtas ang Orlando Magic kinsa mikulit sab og 3-0 nga abante kagahapon dihang ilang gimakmak ang host Atlanta Hawks sa iskor, 105-75 didto sa Philips Arena sa Atlanta, Georgia.

Tungod sa kasikit sa duwa tali sa Lakers ug Jazz, aduna kini 12 ka lead changes sulod lang sa fourth quarter.

Ang three-pointer ni Kobe Bryant kinsa maoy nangu sa Lakers sa iyang 35 puntos, maoy nagtabla sa duwa sa 106-all may 54 segundos ang oras. Human sab molabaw ang Jazz, nakapasulod sab og three-pointer si Derek Fisher aron sakmiton ang labaw, 109-108 sa kataposang 28.6 segundos.

Dihang misipyat si Carlos Boozer sa iyang follow-up, napugos siya’g foul ni Bryant kinsa bugnaw kaayong mipasulod sa iyang duha ka free throws, 111-108 may 7.8 ang nahibiling oras sa duwa ug dayon mi-iskor sab og duha ka free throws si Deron Williams, 110-111 may sayis segundos na lang nahibilin.

May higayon pa unta nga modaog ang Jazz sa kataposang 4.4 segundos dihang nakakula’g loose ball si Kly Korver ug dayong time out sa Jazz apan human niadto, misipyat si Williams sa iyang tirada.

Si Williams naoy nangu sa Jazz sa iyang 28 puntos uban sa iyang upat ka rebounds ug siyam ka assists.

“It was fun basketball to watch, I’m sure. Guys just coming down making big shot after big shot, and big play after big play. It was certainly fun to be a part of,” matod pa ni Bryant human sa duwa.

Si Bryant kinsa mibahug og 20 puntos sulod lang sa first half ug si Fisher kinsa nakaigo og krusyal nga tres, maoy nangsulit sa kataposang 8-2 run sa Lakers kinsa nagtinguha sa 4-0 sweep sa Martes sa buntag.

Didto sa Amway Arena sa Orlando, Florida, mihakot og 21 puntos si Dwight Howard uban sa iyang 16 ka rebounds apan si Rashard Lewis maoy nangu sa opensa sa iyang 22 puntos, upat niini three-pointers.

Sila si Jameer Nelson ug Mickael Pietrus midugang og 14 ug 13 puntos matag usa ug si Matt Barnes miabuno og 11 puntos.

Sulod lang sa 10 minutos isip puli kang Howard, si Marcin Gortat mihakot og unom ka rebounds alang sa Magic kinsa nagtinguha sa ilang ikaduhang sweep human ilang giblangkohan ang Charlotte Bobcats, 4-0. Ang Magic midaog na ug 13 ka sagunson nga duwa labot niini ang sa regular season. - GGM gikan sa NBA.com (BANAT NEWS)