15th Gullas Cup buksan na karon

CEBU, Philippines - Magpinuhalay na sab sa ilang katakus ang mga tang-ang junior tennis players sa pagsikad sa 15th Gullas Cup karong adlawa diha sa Cebu Country Club.

Ang Gullas Cup,   ang labing daku ug malungtaron nga junior tennis event sa Visayas.

"The tournament is now on its 15th year, making it the longest-running tennis event in the region and perhaps in the entire country," matud pa ni University of the Visayas (UV) executive vice president Jose 'Dodong' R. Gullas.

"Next year, we want to make it bigger by including the men's open division," dugang ni Gullas.

Si tournament director Fritz Tabura mibutyag nga kapin sa 100 players ang mosalmot ning lima ka adlaw nga aksiyon.

Matud ni Tabura, gawas sa host Cebu, mopakita sab og aksiyon ang players gikan sa Tangub City, Davao, Cagayan de Oro City, Tagbilaran, Dumaguete ug San Carlos City.

Mangulo sa Cebu mao ang managsuong Sally Mae ug Niño Siso ug ingon man ni Jacob Lagman, kinsa mi-asenso sa iyang duwa human mopailawom og subsob nga ensayo didto sa Espanya sa miaging tuig.

Ang lima ka adlaw nga kompetisyon nga gipaluyohan sa Philippine Lawn Tennis Association (PHILTA) Group-2 gibahin sa age-brackets -- 18, 16, 14 ug 12-under ug 10-under unisex.

Ang mga duwa sa boys division adto himuon sa CCC, samtang ang girls sa Baseline tennis courts.

Giawhag ni Tabura ang tanang partisipante sa pagtunga sa CCC sa dili pa ang alas-8 sa buntag nga maoy deadline sa registration.

Ang order sa duwa ipaagi sa drawing of lots.

Mga tropeyo ug gift certificates ang giandam alang sa mga mananaog. May special award sab alang sa Most Outstanding Athlete. – BANAT NEWS