Carter, Losiaboi nanghawod sa 3rd Mandaue City Run

CEBU, Philippines - Gipahimuslan og maayo ni Madelyn Carter ang wala pagsalmot sa tang-ang si Mary Grace Delos Santos human niya gisakmit ang titulo sa 21K women's division sa 3rd Mandaue City Run didto sa CICC.

Bisa'g wala misalmot ang giilang reyna sa kalsada sa Cebu nga si Delos Santos, nakasugat gihapon og hugot nga kompetisyon si Carter batok ni Mary Joy Tabal sa   Southwestern University (SWU).

Si Carter milabang sa finish line sa oras nga 1:26:56, nag-una lang og usa ka segundo ni Tabal, kinsa mitapos sa lumba sa oras nga 1:26:57 aron sa pagpahiluna sa ikaduhang dapit, samtang si Joeyry Lee maoy mikapyot sa ikatulo sa oras nga 1:30.10.

Sa laing bahin, si Simon Losiaboi walay hunong nga mihakot og titulo human niya gidominar ang 21K men's division.

Gitapos ni Losiaboi ang lumba sud sa usa ka oras ug nuybe segundos, gisundan ni John Phillip Dueñas (1:10) ug Jobert Carolino (1:12) alang sa ikaduha ug ikatulo nga mga dapit.

Sa 10K division, sila si Merian Miranda ug Josephine Leyson maoy naghari sa tagsa-tagsa nila ka dibisyon, samtang sila si Aldren Agang ug Crizel Diongson mao ang nanghawod sa 5K Inter-barangay category.   (BANATNEWS)