Lopez, Delos Santos wala kapugngi

CEBU, Philippines - Bisa'g adunay gamay'ng kakulian sa rota, nagmalampuson gihapon ang "I Run for Earth, I support Cortes Run" sayo sa buntag kagahapon didto sa Mandaue City Cultural and Sports Complex.

Kapin sa 500 ka mga runners ang niapil sa ginukdanay nga gipangulohan ni kanhi RP team member Mendel Lopez, kinsa maoy naghari sa 10K men's open division human niya gitapos ang lumba sa oras nga 32:35.08.

Gisundan ni Elmer Bartolo (33:34.02) ug John Phillip Dueñas (35:31.05) nga maoy miangkon sa ikaduha ug ikatulo nga mga luna.

Wala kaayo makasugat og lisud nga kompetisyon si Lopez gumikan kay wala mosalmot ang iyang karibal nga si Simon Losiaboi. 

Sa pikas bahin, si Cebu-based Mary Grace delos Santos gihapon ang nilangkat sa korona sa 10K women's open human niya gitapos ang dagan sud sa 43:58.03.Mipahiluna sa ikaduha si Madelyn Carter (43:58.08) ug triathlete Lhoriz Echavez (45:32.05).

Sa 5K men's class, si Jobert Carolino mao ang mipatigbabaw batok nilang Roland Montebon ug Riez Enriquez, kinsa mi-okupar sa ikaduha ug ikatulo nga dapit. 

Ang top-three finishers sa 5K women’s open mao sila si Mary Joy Tabal (16:10.28), Clarisse Diongson (15:44.30) ug Merlyn Alin (15:29.44).

Ang barangay Labogon mihakot og duha ka titulo human ang duha nila ka runners nga sila si Ninvingan Ancero ug Crizel Diongson ang nanghawod sa tagsa-tagsa nila ka dibisyon sa 3K category. (BANATNEWS)