Pingoy lakip sa Mythical Five

CEBU, Philippines - Ang  sophomore point guard gikan sa University of Cebu (UC) Junior Webmasters nga si Jerie Marion Pingoy, anak ni kanhi UV Lancer ug PBA star Jerry Pingoy, nalakip sa Mythical Five sa bag-o lang natapos nga 2010 Palarong Pambansa basketball event didto sa Lapus Sports Complex sa Tarlac City.

Bugtong si Pingoy ang dili sakop sa UV Baby Lancers nga nalakip sa team isip re-enforcement nga maoy nirepresentar sa Central Visayas Regional Athletic Association (CVRAA) ni coach Delfin Pepito Jr.

Uban ni Pingoy sa mythical five mao sila si Kevin Ferrer sa National Capital Region (NCR), Alfonso Gotladera ug Van Adam Abatayo sa CALABARZON (Cavite, Laguna, Batangas, Rizal ug Quezon) ug si Michael Nograles sa Western Visayas Regional Athletic Association (WVRAA).

Ang CALABARZON nga gilangkuban sa San Beda Red Cubs ubos sa Sugbuanong coach   Britt Carlo Reroma, maoy kampiyon sa Palaro human ilang gipalagpot ang NCR, kinsa maoy naghupot sa korona sulod sa miaging 15 ka tuig.

Si Reroma maoy napiling best coach ug ang iyang player nga si Al Amin nga gikan sab sa Davao maoy best 3-pointer. (BANATNEWS)