Bernaldez midaog sa Mayor Cortes boxingfest

CEBU, Philippines - Nanginahanglan lang og uno minuto ug 54 segundos sa first round si Mark Bernaldez    aron paundangon si Jumar Terreon sa ilang sinukliay'g kumo sa 2nd Mayor Jonas Cortes Cup Amateur Boxing Championship niadtong miaging gabii didto sa Mandaue City Plaza Square.

Nagpungasi nga one-two combinations ni Bernaldez sa Ebalang Boxing Club maoy gihimo niyang hinagiban sa iyang pakigsangka ni Terreon, kinsa  nagpunga-punga og panagang sa makalipong nga kumo.

Dihang nakita sa referee nga dili na mobawos si Terreon, dali niyang gihunong ang away ug gihatag ang daog ngadto ni Bernaldez.

Ang stablemate ni Bernaldez nga si Christian Apawan midaog sab pinaagi sa puntos batok ni Sherwin Caday sa Sanai Boxing Club, samtang si Robert Labanza sa Taroja Boxing Club mipukan usab ni Rummy Camporedondo.

Duha ka boksidor gikan sa Flores Boxing Club (FBC) nga sila si Malcolm Tuñacao Jr. ug Jomar Caspe ang mipukan sab sa tagsa-tagsa nila ka mga kaatbang. Si Tuñacao mipaundang ni Lyde Bacolod sa katapusang 46 segundos sa second round, samtang si Caspe mikulata ni Mark Anthony Ybañez.

Si Elmer Puno mao lang ang bugtong boksidor sa FBC nga napukan human miyukbo ngadto ni Jared Payao sa Omega Boxing Stable ubos sa 52kgs division.

Midaog usab ang mga boksidor gikan sa Philippine Australian Boxing Club (FBC) nga sila si Ranier Rama ug Kint Mike Tuñacao batok nila ni Marvin Pesalbon ug Ramel Castañares.

Mikompleto sa mga mananaog sa undercard mao sila si Patrick Gulani, Belmar Espina, Bryan Remedio, Rhiyan Jade Canillas, Jessel Mark Magsayo, Danlou Codilla, Jacklord Dao-ay, Vanz Cabahug, Gerry Baoga ug Arde Boyose.   (BANATNEWS)