CEBU, Philippines - Ang 4th season sa tinuig nga European Chamber of Commerce-Philippines (ECCP) Football Cup mosikad karong Abril 25 diha sa Cebu International School (CIS) grounds sa Brgy. Talamban, ning siyudad.
Matud ni ECCP membership officer Sophia T. Erasmo nga adunay 14 ka kompaniya gikan sa IT/BPO ug manufacturing sectors ang nipadayag na sa ilang partisipasyon sa maong torneyo.
Kini mao ang Lear Corporation, e-Telecare Global Solutions, Sykes, Lexmark, Convergys, Wi-Pro, 1&1, NCR, Tsuneishi, Aegis People Support, Teletech, Accenture ug Qualfon.
Aron mapalami ang kalihukan, ang ECCP Football Cup 2010 subling mohimo'g Sports Photography Contest nga bukas sa tanang kawani sa mga partisipanteng kompaniya.
Gipasiugdahan sa ECCP, ang football showdown gipaluyohan sa Cebu Parklane International Hotel, Marco Polo Plaza, Sunsport ug Grand Holidays sa abag sa RC Goldline, URR, Lomocso ug Nature's Spring.
Alang sa dugang mga kasayoran, mahimong motawag ni Sophie sa numero 254-3767 o e-mail ngadto ni Erlinda Reroma sa ereroma@eccp.com. – BANAT NEWS